三喜餐飲小廚鑊氣小炒雞煲火鍋 (已結業)

放左工，想簡簡單單食餐飯，去到佐敦呢間「三喜」，感覺幾親民 (事實上入面既侍應大哥都真係夠晒親民)，就你啦！立即有驚喜！「自製三層豆腐」($78)，豆腐層炸得香脆，黃豆味香濃，最特別既係，豆腐上層加左香茜，中間係豆腐，下層係紅豆，每塊都能夠滿足味蕾既三個願望。「桂花陳皮話梅骨，跟炸鮮奶」 ($88)，排骨肉質軟腍，而且話梅味相當突出，酸酸甜甜夠晒開胃，送飯最啱！旁邊既炸鮮奶亦唔錯，外層脆卜卜，內裡香滑。叫一味餸竟然送埋甜品，夠抵食！三喜招牌雞 (例牌$58)，雞肉嫰滑，面頭用薑容、芫茜、辣椒等配料覆蓋，味道甜甜酸酸，又係開胃菜，夏天食好啱feel！