小城知味 (德福廣場1期)

德福近排開左好多新餐廳，呢間就好隱秘比較難搵，唔係行去平台個邊都幾難發現。新開關係店門外都有staff拎住menu招徠客人，睇過menu都幾有新鮮感，就決定一試～

呢度既菜式我會形容為新舊交融，中菜通常俾人傳統既感覺，但係佢又加入左啲新興既元素，成件事就年輕好多～

招牌香煎美國牛坑腩蔥油撈麵

$88

牛坑腩肉質好軟淋鬆化，好濃郁肉味又有油香，雖然價錢略貴，不過我覺得都值既，而伴碟係微辣既菜脯，我平時唔多食菜脯，不過呢度切到細細粒，少少辣加少少甜，加埋落撈麵度出奇地開胃，所以我都清晒！

風沙單⻣雞翼

$38

其實就似避風塘炸雞翼咁，係一道非常香口惹味既小食，有5隻咁多，份量都唔少，而且單⻣食起上黎好方便！

龍湯浸竹笙什菌

$38

每條竹笙都好肥好厚，好似海綿咁索滿晒鮮甜既龍蝦上湯，配埋其他什菌清清地又不失美味！

麻辣小雲吞

$33

本來想食羽衣甘藍菜肉餃，覺得幾特別係其他地方都未見過，但係店員話未有貨...有啲失望...於是就叫左麻辣小雲吞，麻辣都係我飛佛黎既，原來都有啲驚喜，真係幾重口味，食完條脷真係麻左，唔hea架喎！

1

薑汁湯圓

$28

最後想食個甜品滋潤下，湯圓有兩款，黃色皮紫色餡個隻係蕃薯味，甜度適中蕃薯味都幾濃，幾有特色，另外就係芝麻湯圓，就正常味道啦，薑汁唔夠濃，再辣啲就好！