101手工涮涮鍋 (已結業)

終於有一日放假，難得可以約下朋友食嘢，又凍凍地，想食番一個稍為靚少少嘅火鍋。有朋友介紹尖沙咀呢一間台式火鍋，於是乎就 book咗枱試下。侍應推介極上吃到飽套餐，前菜我就叫咗秘製麻辣木耳，湯底要咗台灣沙茶雞涮涮鍋。另外叫咗牛頸脊肥牛肉，另外仲有好多嘢係個套餐包埋㗎。仲有啲嘢食係冇限制㗎可以無限追加。 首先試咗佢個麻辣木耳，真係好有台式風味，同之前我喺台灣試過嘅口味係一樣嘅，最重要係佢辣辣地好開胃。另外，要推介嘅係佢個墨魚汁鳥結糖、黑松露蟹肉餃同埋三重芝士鮮製蝦丸。墨魚汁鳥結糖，外觀真係好似成粒糖咁， 你覺得掉落去個湯底到好似會溶咁。但係事實上，佢係一粒整到好似鳥結糖咁嘅墨魚塊，食落好有咬口煙煙韌韌，而且仲有啲墨魚粒喺入面，好得意。另外，佢個黑松露蟹肉餃有好重黑松露味 ，令到隻肉餃食落口嘅時候，好香，平時打邊爐絕對食唔到呢一種風味。 另外要講下佢個炸魚皮同埋響鈴卷，係我未見過嘅大size，鍾意食響鈴嘅朋友 真係要試下。最後就要推介佢哋飲品，十分之有特色，同埋好大杯。其實呢一餐所有嘢都好有特色，真係非常之有台灣風格，包括食物同飲品都相當細緻。