東歐餐廳

難得出省城無理由唔搵間好西食下，之前睇過一啲媒體介紹中環有間別具特色嘅烏克蘭餐廳，今日就順便試吓。要食好西必先勞其筋骨，餓其體膚（上斜爬山咁先去到…）餐廳裝修好特別，採用暖燈營造氣氛。我同朋友二人分別叫咗一湯兩主菜。首先係傳統烏克蘭羅宋湯，上嚟係一碗鮮紅色嘅液體，淨係颜色已經同普通羅宋湯好唔同，原來佢係用紅菜頭而非紅蘿蔔煮，味道亦都唔似飲開嗰啲有蕃茄酸，反而有少少清甜😋第一個主菜係芝士焗牛脷盅，唔好睇過細細盅，入面勁多牛脷，仲有少少磨菇，牛脷入口即溶，非常之淋，本以為呢味菜會好漏，但竟然冇，d芝士唔係好咸嗰種，配上多汁磨菇真係好正，如果有白飯就好🤤最後一個菜係基輔炸雞扒，外貌成隻炸蛋咁，一切開d牛油流晒出嚟，極度邪惡，啖啖雞肉非常嫩滑，配菜係厚切薯片，提提大家呢碟野非常之大碟，二人食有啲勉強，搞到最後試唔到甜品🥲聽講佢哋個蜂蜜蛋糕都好出名，唯有下次再試。