地點：銅鑼灣登龍街
菜式：粵菜
餐牌：頭盤，湯類，鮑翅燕窩，燒味，海鮮，小菜，四川風味，蔬菜，飯麵類，甜品，飲品等等。
1
3
5
一坐低就已經有前菜兩碟，分別係炸花生魚仔同酸堯頭，好香口開胃。每小碟$20。
茶位每位$20，茶壺用蠟燭暖住。
脆焗鮮鳳尾蝦多士 每件$68 另加一
叫左件脆焗鮮鳳尾蝦多士，大大件，炸得脆皮入面蝦肉好彈牙既大大件多士，伴有香甜黑醋沙律菜同另上沙律醬可解膩。果然係招牌菜式，大件夾好味道。
新加坡黑胡椒蟹爪粉絲煲 （例） $268 另加一
新加坡黑胡椒蟹爪粉絲煲好大煲，熱辣辣上枱。蟹爪有六大隻，整得殼脆肉鮮嫩。個汁叫左少辣，味道甜甜地，完全唔辣，好味道呀。下底好多粉絲，吸嗮汁，又滑又夠味，加埋少少芫荽更清香。
大良炒水牛奶 $228 另加一
大良炒水牛奶有大大pat香滑水牛奶上面有六片帶子，灑上脆口松子仁添口感，帶子味道鹹香，口感鮮嫩。圍邊有六隻蝦仁，都好爽脆，加有食用花同菜仔裝飾。炒水牛奶超滑溜，入口即溶，味道係好香奶味而帶鹹香，而份量超多。
上湯千層莧菜 $188 另加一
上湯千層莧菜有好多鮮嫩莧菜加上杞子，圍邊有六大件千層豆腐。莧菜好嫩滑，鹹度剛好，令d菜好夠味，而豆腐食落入面真係有好多層，口感特別，係健康味道好既一道菜式。
桂花五色糕 $58 另加一
桂花五色糕賣相出色，明顯見到五層，介紹由上至下分別係桂花，木瓜，士多啤梨，芒果同椰汁。食落係清爽而帶多重味道，先有桂花香，然後有芒果同椰汁甜味，而且食到爽脆果肉！
總括而言，食物質素不俗。餐廳裝修高檔，有開揚景致，今晚仲見到浪漫日落。服務員態度良好，上菜收碟快捷。食物質素唔錯，適合商務同友人飯局。
