廟街冰室 (已結業)

最近喺佐敦發掘到一間懷舊冰室，下午茶時段抵食大份，性價比頗高 朱古力雪山西多士 ($35) 係淋上朱古力醬同灑上糖霜嘅一口西多士。麵包切粒後炸，令酥脆表面比傳統多士增加，適合鐘意香口小食嘅食客。西多士按照舊式做法無夾花生醬，味道主要黎自雞蛋、朱古力醬同糖霜，比較甜。口感方面，炸多士略乾，食到尾凍咗會偏硬，不過勝在炸嘅時候麵包無吸曬d油變得油膩。邪惡菠蘿包 ($30) 可以配搭咸牛肉、餐肉、炒蛋其中兩款。以鹹食夾入甜包，味道有對比，幾特別。菠蘿包外脆內鬆軟，可惜中心嘅氣洞略嫌太多，咬落偏軟，應該更扎實入口先會比較實在。咸牛肉炒蛋正常水平，夠香夠嫩滑，不過稍為油膩咗d，令麵包吸咗唔少油。涼粉紅豆冰 ($24) 味道偏甜，特別係紅豆，單食實在太甜，搞勻混合淡奶再食會相對平衡一d。至於口感，涼粉夠爽口，紅豆亦軟硬適中，軟糯得黎保留咬口，煲嘅時間掌握得唔錯。