岩浪天扶良日本料理 (已搬遷) 新店位置

我本身好鍾意食廚師發板嘅日本菜，因為通常都係用當日最新鮮食材，同埋最緊要係唔使諗食乜，但一定好味，所以今次朋友生日我都帶佢嚟食呢間廚師發板，雖然佢係omsake 但套餐入邊都有好多唔同選擇同埋唔同配搭，我食過一次覺得好好味，今次特登請朋友食。唔好彩嘅係我嗰日竟然喉嚨發炎，所以費事食生冷野，第一次喺度單點左其他熱盤食物，水準依然係與以往一般嘅好。廚師發板首先有前菜，一啖一口，賣相非常精美，味道多數喺以酸酸甜甜為主，特別開胃。刺身肥美，全部都好新鮮，但最精彩當然係嗰舊肥美拖羅啦，我冇食到，但係朋友話入口即溶，同喺日本食到嘅質素差不多。低溫安康魚干，軟綿綿嘅口感，好香魚干味。白金鯛鍋我開頭以為刺身魚用火鍋形式煮熟佢，口感會否大打折扣，點知魚非常滑而且又好香鮮魚味，味道非常新鮮，最緊要啱晒我呢個病人食。蟹肉蒸蛋又係我食啦，蒸蛋超滑，配埋蟹肉同特製醬汁食 yummy另外呢個低溫煮豚肉配埋雞蛋一齊食，開頭見到咁多肥豬肉以為會好溜，點知食落好似食緊啫喱一樣，超級好味。食咗幾個熱盤都係我食，到我朋友食佢最愛嘅壽司，其實壽司只要新鮮就一定好食，但海膽飯味道勁濃郁，朋友食到雙眼發光，超正。魚鮫好滑啖啖肉。