牛舞日本燒肉‧涮涮鍋放題 (1亞太中心) (已結業)

之前疫情無咁嚴重嘅時候， 天氣少少凍，我哋就去咗觀塘新店豪食燒肉放題。 我哋擇咗澳洲樂天和牛套餐，仲可以試埋附送嘅牛舞拼盤，一次過食到多款和牛、雞腿肉同豚肉片，仲包括2 塊薩摩牛。以前比較少有放題可以食到薩摩牛，宜家多咗餐廳提供，質素參次，但今次薩摩牛牛肋肉略烤兩邊，入口香口又帶鮮嫩。如果升級到最豪華，仲可以任食薩摩牛。不過，我哋食和牛餐肚子已經好滿足，因為款式超多，有驚喜，每次可以叫大約10 款，但上菜幾快，輕鬆回本。 有啲特別款式：原粒雞腎、芫荽豚肉卷 同大過手掌嘅豚肉，仲有海鮮，牛油蒜蓉扇貝比較迷你，虎蝦都幾大隻，仲有燒蠔、鯖魚同蜆。除咗燒肉，仲可以好似日式放題咁， 任食刺身、天婦羅同串燒，可能本身係主打燒肉火鍋，對刺身期望唔大。三文魚同帶子新鮮程度一般，可以燒下再食，火炙左會好味啲，食咗少少其他刺身吞拿魚嗰啲就直接食返天婦羅。天婦羅唔算好厚粉，有茄子、冬菇同炸蝦等好多都係我鍾意嘅款式。 至於自助沙律吧、 熟食同甜品，我哋肚仔就無乜空間再試， 係食過啲炒通菜同比較硬身嘅牛腩，我哋都係俾大量日本雪條吸引咗，推介士多啤梨脆皮，仲有有宇治抹茶、波子汽水等口味。