泰皇閣泰國菜館 (已搬遷) 新店位置

好耐無食泰國嘢，諗起九龍城有好多選擇，又聽過同事話泰皇閣幾好味，於是就約咗朋友去開餐。馬拉盞炒椰菜苗 - 椰菜苗好爽脆，配馬拉盞好夾，超有穫氣，仲食到粒粒蝦米，好香，正! 泰式乾炒豬肉河 - 啲河粉好得意，唔係平時食到嘅條狀，切到正方形咁樣，好大片，炒得好乾身，食到碟底都無咩油，甜甜哋，又煙煙韌韌，配埋豬肉同爽脆蔬菜，好味。黃咖哩雞 - 好重椰汁，無咩辣味，啱晒怕辣但又想食咖哩嘅朋友，食落香口又惹味，裡面有雞肉、薯仔、蕃茄仔、青椒及洋蔥，加入蔬菜令咖哩更清爽。燒鰂魚 - 雖然鰂魚只係用鹽燒，好簡單，但就可以最直接食到魚嘅原味同鮮味，魚肚加入香茅一齊燒，不但可以辟腥，仲為魚肉帶嚟清新嘅香味，老細教我哋魚肉就咁點魚皮嘅鹽食，果然食到魚鮮味; 另外，點埋個泰式醬汁，酸酸哋，好惹味。2種唔同食法，各有風味，好特別呀! 呢餐埋單每人都係百幾蚊，同事果然好介紹。