漁民麵館 (已結業)

前排去開元朗，經過呢間餐廳見到門口好多人等位，上網一搵之下原來係主打親民價花膠，今日趁平日少d人一於黎試下。餐廳位於元朗西巴士總站旁邊，非常容易搵，差唔多兩點去到，餐廳都有七成滿，好彩唔需要等位。餐牌只有兩版，非常簡單，今日叫咗花膠湯麵及涼拌木耳。涼拌甜酸木耳好快就到，份量都唔少，木耳入口爽脆，味道甜甜酸酸好開胃，一啖一塊話咁快就食晒。主角嘅花膠湯麵過咗陣亦上檯了，一碗大約有四至五塊花膠，一隻冬菇切半及菜心，先試啖湯，都幾鮮甜，有微微韮黃香味，冬菇煮得夠淋，花膠雖然唔係咩貴價貨，但味道唔錯，以咁嘅價錢算超值。總括黎講，呢度嘅食材雖然唔係好高質素，但平平地有花膠同魚翅食，算值得一讚。