帝都糕餅店 (已結業)

晌帝都酒店間糕餅店買咗幾件餅返去同屋企人食。個盒都幾靚，不過因為太大，返到屋企啲餅已經東倒西歪，好彩都唔算太嚴重，只係整花咗少少。鮮雜果泡芙，上面係士多啤梨，中間就夾住吉士醬，食落一陣風，兩三啖就搞掂。美式芝士蛋糕，食落有少少漏。抹茶慕絲蛋糕，抹茶味都幾出，不過上面嘅糖漿食落太甜，有少少怪怪哋。黑加倫慕絲蛋糕，呢個嘅味道就比較酸，對我哋嚟講都OK，但就唔太鍾意佢夾雜住朱古力蛋糕。啲餅賣相係幾靚，不過每款硬係有爭少少嘅感覺。