拉麵達人 (已結業)

去完美容院搵拉麵食，見呢間新開。店內裝潢有日本街頭風，調味架有蒜粒自夾變蒜蓉、即磨芝麻、自製漬辣菜。要咗同店名相同嘅麵，好快嚟到。湯底帶豬骨香，濃稠度適中，配料豐富有木耳、粟米粒、葱花。叉燒半肥瘦有層啫喱皮，真正入口即溶，如果火炙過有焦香仲正，但已經非常出色，好耐冇試過咁好嘅叉燒！溫泉蛋溏心富濃郁蛋香，調味帶鹹味但適中。美中不足麵條並非新鮮製屬日本來貨。但整體味道出色。而且新開張除咗送汽水仲有9折，份量偏大，抵食又好味！店主主動問客人意見，提醒我用蒜頭夾蒜蓉落去食，試過果然仲香濃，而且蒜新鮮自己夾，又可自己揀落幾多，點子唔錯。我仲試咗啲辣菜，有啲九層塔香味，帶清脆辣勁，同食開嘅四川麻辣、湖南酸辣截然不同，但自有誘人之處，欲罷不能。不過始終店新不到一個月，人流稍遜。兩個店主係後生仔，對拉麵好有熱誠，曾於橫濱、拉麵來等做過。因製麵機成本高，小店難以支撐到，期望店舖站穩腳步可逐步改進。聞說星期日有雲達人拉麵，湯底更重口味，搵日去試。