Cat 喇沙 (已結業)

夏天有時都熱到冇曬胃口，上網搵到呢間喇沙店諗住食過惹味湯底醒醒胃。今日難得有老細資助，決定要食好啲。餐廳環境美觀，有東南亞風情，牆上色彩繽紛。揀咗個每日限定嘅龍蝦喇沙，再配椰子冰（套餐跟配可以半價）。椰子冰轉頭上送上，估唔到咁好飲，椰子味香，亦有奶香，而且飲落仲咬到粒粒椰肉，食物未到都已經飲咗大半杯。龍蝦喇沙上檯個陣真係嚇到我，佢真係原隻龍蝦咁樣放喺個喇沙湯麵上面，霸晒成個湯碗表面，廚師都有預先將龍蝦輕輕剪開，我就先將佢拎開，因為要試咗靈魂湯底先。個湯底非常之出色，各樣嘅味道都好平均，既有小辣亦有椰香，又唔會太油，喇沙麵底摻摻份量十足，配搭湯汁一流，加埋豆卜吸晒汁，超正。仲要湯底飲左一大半之後都唔口渴，超乎預期好味道。最後我就食埋主角龍蝦，餐廳有提供工具去拆龍蝦肉，食落夠晒彈牙，大大隻龍蝦啖啖肉，鮮甜又有咬勁，超級大滿足，同食蝦真係唔同，久唔久嘅放縱食慾真係需要！