發哥粥底海鮮火鍋 (已結業)

友人九龍灣返工，經過附近收到店舖派既$20優惠coupon，所以過黎試下，原來新開張無耐「發哥粥底海鮮火鍋」，位置比較隱蔽🤣友人帶路加上鋪頭好多大大個招牌，一啲都唔難揾✨嘩！入面環境好闊落，有卡位又有大圓枱，無論兩個人定一班朋友都照顧到.. 火鍋套餐分有幾款，我地就㨂左B.雞煲+任食配料+任飲，每位只係$198 限時2.5鐘，其實夠晒時間食飽飽。仲有魚生送，以為只係簡簡單單三文魚刺身，點知仲有甜蝦同帶子，仲好有心機加左蟹子🤣食落都幾新鮮，不過就冇得追加。 雞煲，係人頭計雞的，四人分量都算唔少，友人不吃辣，我地要左唔辣，雖然唔辣，雞已醃得入味，嫩滑好夠味👍🏼食完雞就加入湯打邊爐。任㨂配料，絕對唔係俾任食既質素，有五十幾款仲有小量海鮮選擇。海蝦🤗雖然細細隻，新鮮鮮甜，肉質實淨，上枱仲郁緊架。海沙白，食蜆最怕有沙，依度吐沙好乾淨，大大隻好靚仔，食落都好新鮮。肥牛同黑豚肉：睇相都知正，估唔到甘好質素，返叫左好幾轉，一樣料，冇俾啲差既我地，無雪藏味，肥瘦適中👍🏼👍🏼好正。墨魚🦑滑：有墨魚味之餘，仲好彈牙！飲品任飲，基本汽水🥤都有服務唔錯，主動換碟加湯，應該係經理既靚姐，仲好熱情❤️推薦我地有咩好食