鳥棲日本料理 (已結業)

話說公司有觀塘嘅office，有時候都會過嚟上下training 。嚟咗幾次觀塘，感覺好似無乜餐飲選擇，啲人通常都係去大商場嘅餐廳。呢一日朋友帶我嚟到某座工業大廈入邊嘅一間日式料理餐廳，入到去間工業大廈，估唔到地方都幾闊落，應該係活化過。雖然係係工廈入面，不過間餐廳唔算好大，而呢晚又幾多人，所以等左一陣先有位。聽講呢度既原條鰻魚炒飯同埋月見免治雞肉幾出名，不過我同朋友想試下其他野，所以叫左個豚肉炒麵、日本松島魚餅、幾串串燒(雞翼、和牛同牛舌)、櫻花水信玄餅，仲叫左杯巨峰富士山特飲。啲串燒上既時候熱辣辣幾好食，最中意佢既串燒牛舌，大大舊又好入味。松島魚餅第一次食，好有魚味又幾彈牙，食下食下就食晒成碟🤣至於豚肉炒麵就用鐵板上，所以可以保持熱度，不過份量就係一人份量，如果兩個人分可能有少少唔夠。信玄餅都係第一次食，食落唔會好甜，所以前面食飽左都唔驚最後杯富士山特飲有舊雪糕扮富士山，又會閃閃下咁，都幾得意。總結黎講呢間餐廳選擇眾多，都幾適合同朋友黎聚餐。