INN - I’m Not Nothing

營業中

休息中

今時今日荔枝角已經成為左文青Cafe嘅集中地。今日嚟到位於億利工業中心入面嘅Cafe食晚飯。餐廳裝修得非常之有格調感覺俾人好舒服嘅感覺。餐牌主要都係西式嘅食物。我哋睇到旁邊嘅客人要嘅食物份量都幾多下，感覺價錢都幾合理。最後我哋嗌咗黑松露芝士薯條，水牛城雞翼，澳洲肉眼扒配薯菜跟五成熟，玉桂蘋果班戟配雲呢拿雪糕。飲品就叫咗西柚檸檬梳打同埋士多啤梨藍妹奶昔。黑松露將嘅味道非常之濃厚，配埋啱啱炸好嘅薯條味道十分之一流。水牛城雞翼嘅size亦都大大隻，配搭埋個醬汁真係非常之開胃。肉眼扒嘅肉質非常之鮮嫩，牛味亦都都幾重。最後用玉桂蘋果班戟配雲呢拿雪糕嚟完結呢一餐真係非常之幸福。飲品方面亦都做得唔錯，唔會過甜啱啱好。呢間Cafe真係值得一讚，事關佢所有嘅餸分量都非常之多，性價比可謂非常之高。賣相擺盤各樣都做得非常之唔錯。出餐嘅速度都幾快，店員亦都好有禮貌。食完之後亦都唔會好趕住收碟想趕你走。餐廳嘅燈光比較昏暗亦都好適合情侶嚟食飯。