文華咖啡冰廳 (已結業)

本來想食韓點, 點知排哂長龍, 等左一陣見條隊又無咩點郁過, 無心機等唯有入去呢間貌似冰室既荼餐廳食入到去, 無我想像中個隻懷舊味道, 有d失望~仲要有d污糟, 有蚊滋飛黎飛去! 凳上面又有d污跡… d侍應個個都無笑容, 仲好惡甘既樣… 動作非常慢, 好唔憂做甘…總之由我坐低到野食黎之前我都有好後悔入左黎既感覺我要左份魚柳沙律下午茶餐, 等左一陣先送到黎~ 先食沙律, 好普通既港式沙律, 味道一般而且用料唔新鮮, 沙律醬落得太多! 至於魚柳, 賣相比沙律好, 但未算金黃~ 點知響完全無期待既情況下, 我竟然食到一份超高水準既炸魚柳!!! 外脆內嫩, 沒有半點油膩感, 食唔出任何雪藏既味道, 而且唔會出現皮同肉分開既情況, 可見炸工一流, 呢塊魚柳我會比滿分! 本身我男朋友好飽無食到, 但幾經我游說之下佢食左一小舊, 平時唔鍾意食煎炸野既佢都覺得驚為天人一仲一食再食添!真係唔係誇張, 我誠意推介大家去試下呢塊高質素魚柳!本來味道係想比5分既, 但因為個沙律而扣佢一分