河內越式料理 (西洋菜南街)

營業中

休息中

今日下午茶時間去左旺角 西洋菜南街嘅河內越式料理.餐廳下午茶時間都仲有唔少食客，睇黎人氣都唔錯。坐位舒服而且備有紙巾，非常貼心。而下午茶餐都幾多選擇。仲有好多越南特色飲品可以加配。我就叫左香茅豬扒撈檬，跟餐加左一個小食，越式豬頸肉。飲品就叫左杯凍越南滴漏咖啡。香茅豬扒撈檬，下午茶黎講份量都幾多香茅豬扒肉質嫰滑，食落都幾juicy，表皮都幾脆口。撈檬配上生菜絲，蘿蔔絲，蔥油，花生等配料，食落更爽口。撈檬凍湯汁酸甜清新，放喺枱面按個人口味加入。 小食- 越式豬頸肉，一人份量，薄切豬頸肉食落煙韌，唔會太乾。而且油脂充足，燒得夠火喉，幾好食。凍越南滴漏咖啡，煉奶香甜，但唔會覆蓋左咖啡嘅香濃味，配搭得幾好，不會過甜。