影片
更多
2022-07-20
234 瀏覽
相信大家都會同意，屋企入面嘅廚藝高手多數都係老一輩嘅婆婆或者嫲嫲，今日我地黎左一間叫做『川婆婆』嘅川菜餐廳，唔知能唔能夠食到值得回味同懷緬嘅味道呢? 今次就帶大家打開『川婆婆』嘅神秘面紗！ 點解要叫神秘面紗呢? 首先，佢嘅位置可以話係『柳暗花明又一村』，佢零零捨捨屈左入寶勒巷入面，如果你行過條大路冇為意專登望入去，就可能錯過左呢一間餐廳！不過，川婆婆花左好多心思係裝修上面，門面近乎用全紅色，紅噹噹除左吸引眼球以外，更突出到佢係食『辣』嘅主題！而且係上去嘅樓梯位置，佢都放左幾個國術用黎『變面』嘅面譜係度做裝飾，所以我地就以神秘面紗黎形容啦！ 只要行上呢條樓梯，你就會黎到川婆婆嘅門口啦! 食好西係要付出努力架啦，加油!上到黎你就會見到，有室外同冷氣位，咁熱嘅天氣，我地當然會坐冷氣位啦！ 一入到餐廳，佢唔似出面咁用紅色做主題，反而簡簡單單用番石屎面，加上一d別緻嘅標語，營造出街頭食串串嘅特色，別有一番風味! 坐嘅位置都寬敞，唔會夾硬要大家逼埋一齊，雖然張櫈係圓櫈冇靠椅咁好坐，但大家可以打開張櫈將d外套同袋放入去，咁樣就唔會吸晒『麻辣味』啦! 好貼心! 值得讚！ 接下黎，就係要睇一睇下個餐牌
相信大家都會同意，屋企入面嘅廚藝高手多數都係老一輩嘅婆婆或者嫲嫲，今日我地黎左一間叫做『川婆婆』嘅川菜餐廳，唔知能唔能夠食到值得回味同懷緬嘅味道呢? 今次就帶大家打開『川婆婆』嘅神秘面紗！
點解要叫神秘面紗呢? 首先，佢嘅位置可以話係『柳暗花明又一村』，佢零零捨捨屈左入寶勒巷入面，如果你行過條大路冇為意專登望入去，就可能錯過左呢一間餐廳！不過，川婆婆花左好多心思係裝修上面，門面近乎用全紅色，紅噹噹除左吸引眼球以外，更突出到佢係食『辣』嘅主題！而且係上去嘅樓梯位置，佢都放左幾個國術用黎『變面』嘅面譜係度做裝飾，所以我地就以神秘面紗黎形容啦！
只要行上呢條樓梯，你就會黎到川婆婆嘅門口啦! 食好西係要付出努力架啦，加油!
上到黎你就會見到，有室外同冷氣位，咁熱嘅天氣，我地當然會坐冷氣位啦！
一入到餐廳，佢唔似出面咁用紅色做主題，反而簡簡單單用番石屎面，加上一d別緻嘅標語，營造出街頭食串串嘅特色，別有一番風味! 坐嘅位置都寬敞，唔會夾硬要大家逼埋一齊，雖然張櫈係圓櫈冇靠椅咁好坐，但大家可以打開張櫈將d外套同袋放入去，咁樣就唔會吸晒『麻辣味』啦! 好貼心! 值得讚！
接下黎，就係要睇一睇下個餐牌，餐牌入面都透露左一個細微嘅訊息，就係有個帶住黑超好潮嘅婆婆食緊串串火鍋，令我地有d期待! 個放題可以食足100分鐘，d野食可以自己任拎，唔駛等晒d時間，CP值超高! 今次我地揀左B餐，一人可以揀一款牛，仲送海鮮拼盤，雖然成300蚊1位，但食完我地真心覺得物超所值！
一個大L型嘅雪櫃，入面放左好多唔同嘅自助食物，大量嘅肉肉同唔同嘅菜，大部份佢串好晒，勁好心機，份量又分好一份份，勁方便! 想食乜就拎乜，而且入面好多刁鑽嘅食材，而且比你任拎，由於食物嘅種類真係太多，我地都真係唔係樣樣食得晒就已經飽左，真心好抵食!! d食物跟住落黎我地會慢慢推介!
另外佢仲有一個極大嘅飲品櫃，入面有多款汽水同飲品，當中包括無糖既茶、解辣嘅維他奶、仲有加多寶添! 最特別係，佢所有汽水都係玻璃樽250ML 裝架、連埋紅茶花傳嘅茶都有玻璃樽裝，真係落足本! 除左呢d之外，仲有最近大熱既ANSON LO代言嘅0糖0卡0脂飲品，可以滿足到唔同人嘅需要!
佢個醬料區都好值得一讚，特別係個醬油碟好大個，可以落到好多料又唔會滿瀉，食好辣嘅人可以落辣椒+辣椒粉加醋同豉油(大推, 記得加醋呀!)，唔食得辣嘅可以用芝麻醬，岩晒唔同人!
座位上面有2個爐，一邊可以比你燒肉，一邊可以用黎打邊爐，一次食晒2種口味! 正!
要進入正題啦，個店員知道我地其中一個唔食得太辣，就叫左我地揀鴛鴦鍋，一個係黃酒雞湯底，一個勁特別係麻辣紅茶湯底!
👉🏻麻辣紅茶湯底
由於天氣太熱嘅關係，店員話老闆新推出左呢種湯底比大家揀，食落會解膩d同下火！有3款茶底揀，有普洱、紅茶同菊花茶，佢仲會另外配多支玫瑰水或者桂花水比大家揀，用黎加湯，另外仲多一壺椰漿添，如果擔心太辣就可以加落去中和一下，超貼心!
我地之所以大推呢個湯底，除左用料足同充滿心思之外，最重要都係味道夠正，有超豐富嘅層次! 係最初嘅時候，我地會食到d配料會有陣玫瑰花香嘅麻辣，加上茶底真係中和左d肉肉既油膩感，真係可以食多幾串!
食到一半左右呢，個湯底陣花香就會冇左，就會變成麻辣湯底味，但由於係茶底，唔會一味死辣，令人食得好舒服!
食到咁上下，你就可以加下個椰漿，令個湯底多一陣椰香同甜味，就會食到另一番風味！真心，呢個湯底係每個階段都令我地覺得好驚艷，真係要試下呢隻茶湯湯底!!
👉🏻黃酒雞湯底
呢個湯底超多菇，有蟲草花、茶樹菇、姬松茸、舞茸等等，(大家千其咪咁快食晒d菇呀!!雖然d菇好好食) 起初食落味道唔重，但川婆婆玩味道層次真係好叻，當你一路滾呢個鍋嘅時候，奇蹟就會出現! 個湯居然變左勁濃郁嘅菇湯底，用黎食菜同海鮮呀，真心一流!!
👉🏻牛小排、牛頸脊
講完湯底就要講下主角，就係一人一碟嘅精品牛啦！份量唔少架，你望落好似細細碟，其實佢下面仲有好多肉墊底，一碟大約有1X塊牛! CP值超高!
先講牛小排，牛小排堪稱一隻牛最靚嘅部份，用黎燒肉同打邊爐都好岩食，脂肪比例重，肉質較為滑同淋!
至於牛頸脊呢，你見到都好多雪花，但其實岩減肥人士食，因為牛頸脊既脂肪含量較低，而且牛肉味重！不過，相比起牛小排，就會冇咁淋！
由於呢2碟肉都好靚，打邊爐唔係唔好，但有雪花嘅肉用黎燒既話，佢嘅油香都逼晒出黎，加上有少少脆邊，一路燒一路加少少枱面有嘅雜香料鹽，牛肉味真係出晒黎! 如果喜歡食牛肉味嘅，個人建議燒肉燒晒佢!
👉🏻海鮮盤 - 2人份
呢個海鮮盤係送嘅，有2隻鮑魚仔、2隻大虎蝦、同沙白10隻、福建蟶子10隻，d海鮮好乾淨，可以安心咁食！沙白、蟶子同飽魚都好鮮甜，虎蝦超大隻，肉勁厚!!
店員推介我地食佢嘅肥牛串、新鮮牛肉串、薯粉(大愛)，仲有台式丸等等！
👉🏻金菇肥牛串 & 韭菜肥牛串
平時係屋企食最麻煩仲工序就係包，但金菇肥牛卷真係天作之合，咁樣卷埋真係有口感得黎又好好食，呢度一串串，串好晒，直接落鍋唔會散，爽!
至於韭菜肥牛卷，就見人見智啦，鍾意食韭菜既人就會好中意食! 都係推!
👉🏻莞茜牛肉串 & 白辣椒牛肉串 & 菠蘿牛肉串
聽店員講莞茜牛肉串係呢度嘅鎮店之寶，的確，由於莞茜好鮮，食落去莞茜味好濃，加上老闆堅持用新鮮牛肉，肉質較滑而肉味濃，愛莞茜人士必食!!
冇諗過呢度居然會有白辣椒牛肉串，白辣椒係湖南名物，用黎炒肉一流，本身白辣椒唔會好辣，但味道好濃，夾埋牛肉食就岩晒重口味人士!
至於菠蘿牛肉串呢，就好適合女士啦，食落酸酸甜甜，加入去麻辣鍋入面都唔會好辣，因為菠蘿既甜酸味會中和番D辣味，食落又好開胃! Yummy!
👉🏻辣拌魷魚鬚
全兜都係鬚，我地拎晒去燒，唔太辣，食落好爽口，口感一流! 中意食魷魚鬚，唔好放過!
👉🏻台式丸
呢度嘅台式丸有三星蔥豬肉丸、粟米丸、墨汁墨魚丸同埋芝士丸！三星蔥豬肉丸放入口要小心，因為三星蔥既汁會爆出黎，超香濃! 至於呢隻台式芝士丸嘅芝士味較淡，但好流心都唔錯呢! 墨汁墨魚丸好彈牙，而且有淡淡嘅甜味，好特別! 至於粟米丸就好Juicy!!
👉🏻牛黃喉、牛柏葉、魷魚花
居然牛黃喉呢d刁鑽部位都有得食，一咬落去，極其爽口彈牙，大推!!
其實牛柏葉係一樣打邊爐嘅絕妙食材，不過好多時我地都會唔記得撈番上黎搞到縮晒水，UN晒。不過，呢度d牛柏葉係串起左，你就唔怕到時撈唔番，一拎就食得，超貼心!!
婆婆真係婆婆，魷魚切到起晒花，刀功一流！正正因為刀功嘅關係，串魷魚比起平時食更為爽口易熟！同一樣嘅食材，但只要花少少心思，味道同口感就會得到大提升! 正!
👉🏻豆卜串
又係麻辣火鍋另一樣嘅名物，超索湯吸味……佢唔係比普通豆卜!! 抵讚!
👉🏻鵝腸、黑柏葉、墨魚仔、萵苣
鵝腸每一條都好肥美好飽滿!! 不得了!
而且我地冇諗過會有黑柏葉食，每一塊都好大塊，唔使擔心搵唔番! 爽口又健康!
墨魚仔就好彈牙，唔會縮水!! 佢本身仲開埋肚，可以兜住d湯同汁食，正!
至於萵苣配埋麻辣鍋又係絕配食材! 正!
👉🏻墨魚麵 & 雜菜籃
川婆婆嘅特色食物真心好多，估唔到會有墨魚麵食!! 墨魚麵麵質爽身，食落有嚼勁，而且微甜，好有驚喜!
雜菜籃就記得要配個黃酒雞湯，當個湯味道起左變化變成菇湯之後，將d菜放入去，連埋最初d菇一齊食，勁重菇味，真係好適合用黎食菜!!
👉🏻薯粉
今餐最驚艷嘅就係呢個薯粉，好大塊，又勁滑身同索汁! 拌芝麻醬食又得、拌醋+香料一齊食又好得! 我地係咁食個薯粉…..食左好多，哈哈哈哈! 食到食唔到其他野! 爆推!
總括黎講，川婆婆呢個放題真係好用心同高質，食材經過精心處理同挑選，加上有好多刁鑽嘅食物同種類，又可以燒同打邊爐，最正係連飲品都高質! CP值勁高嘅放題，好值得回頭經常食!! 無論食辣同唔辣都好，風味特色都好出色，好岩同朋友一齊黎食!
張貼
