Shine (已結業)

睇見呢間餐廳評價幾好，就約朋友放工之後來食晚飯。餐廳好有格調，呢度有吧檯、雙人座、五六人大檯，無論情侶食飯定朋友聚舊或者來飲杯野都好適合。我地叫左兩個Main Course同一個甜品。香煎挪威三文魚扒配香草忌廉檸檬汁呢碟嘅擺盤幾靚。個香草忌廉檸檬汁調得好好味，而且汁嘅份量足夠點曬成件三文魚扒。三文魚扒煎得好好，魚皮煎得金黃香脆，魚肉口感幾軟滑，一啲都唔粗糙。另外仲有薯仔、蘿蔔條同蘆筍做配菜，但就略嫌有幾塊薯仔煎得燶左少少。BBQ醬配燒豬肋骨呢個豬肋骨係即叫即燒，要等大約40分鐘。豬肋骨每件都好大舊，而且每件都算多肉，唔會有太多肥脂肪。雖然豬肋骨外皮燒得有少少燶，不過配埋BBQ醬，整體個味道都幾好食。火焰雪山火焰雪山係其他西餐廳比較少有嘅甜品，所以我就簡左來試下。上檯嘅時候侍應會點火，外面嘅蛋白會慢慢融化。蛋白之間夾雜住藍莓同士多啤梨，裡面有海綿蛋糕、雪糕、Brownies、Macaron，呢幾款甜品個味道都係偏甜。個人幾鐘意呢個火焰雪山，一次過可以食到唔同嘅甜品，而且有冷有熱，口感好多樣。