喂呀！又俾我挖到寶啦～
位於尖沙咀韓國街嘅「韓屋」真係不得了！舖頭細細，得幾張枱，但係成日滿座！好多熟客返轉頭幫襯，我今日專登早啲嚟先唔使等位咋！
【薯仔排骨湯 $168 】
真心驚艷！湯底超濃郁，排骨煮到啱啱好，一夾就離骨❤️ 薯仔吸晒啲精華，軟糯入味～飲完成個人暖笠笠，好治癒啊！必點推薦👍
【醬炒牛肉石鍋拌飯 $128 】
上桌仲滋滋聲！牛肉醃得超入味，醬香濃郁～撈埋紫菜、芽菜、蘿蔔絲、豆皮同翠玉瓜等等嘅配料，再加埋脆脆飯焦嘅加持，口感層次爆棚！食到最後一啖都仲係熱辣辣～
【煎醬牛小排餃子 $88 】
皮薄餡多！煎到金黃香脆，入面係滿滿嘅牛小排肉餡，肉汁鎖得好好～點埋佢哋特製醬汁，真係停唔到口啊！
環境雖然唔大，但乾淨企理～重點係店員姐姐笑容滿分😊 落單出菜快狠準，勁熟手！餐牌選擇唔算多，但樣樣都係正宗韓式口味，真心高質～！
