前家樂餐廳火鍋店 (已結業)

老闆仔一坐低就熱情地同我地介紹佢地既鎮店之寶，佢係個陽光大男孩，係一塊不折不扣既小鮮肉，令在座戴左大眼仔既auntie睇到眼核都放光，久旱，要逢甘露鳥。嗌左烤海鯇魚鍋（小邊）香辣蝦膏味178小邊鯇魚邊度小，條魚一啲都唔細，足足有成尺幾長，雖然等左成十五分鐘最薄嗰個位先至熟，但係入口嗰吓，你會覺得乜都賺哂番黎，由於係一督得過就即刻食既關係，魚肉當然勁滑，配以甜甜辣辣既醬汁，老老豆豆蝦膏味就爭少少架喇，但係條魚鯇魚味極濃，鐘意食鯇魚既朋友真係不容錯過。邊爐料方面全部都好新鮮，魚皮勁脆，浸完湯都樂樂聲；唔係度度都有既萵荀，個心都幾嫩；冰豆腐索哂啲汁真係正到裂；打邊爐仲緊要過個爐既手切肥牛亦都充斥牛味；鮮肉仔推介既生蠔好新鮮，較好時間啱啱熟即刻食份外juicy；芝士竹輪喺口內爆芝，好特別，芝士好香好好味。埋單都係二百六十蚊位，有好野食又有小鮮肉睇。