茶王冰室 (洗衣街) (已結業)

旺角出名迫，無論食晏定晚飯都係咁多人😅有次行經呢條街見到間茶記，大大塊易拉架寫住茶王之王奶茶，嗰陣已經好想試😂今朝喺旺角食完早餐有嘢搞，就一路去到下午茶先有時間再食😅先嚟嗌咗個常餐，多士、火腿奄列、沙嗲牛！呢到啲公仔麵全部都係出前一丁，另外搭返包麻油比你自己加😉特別值得一提係佢有西柚茶嗌，兩大塊西柚，都只係收緊凍飲加$3嘅價錢！！朋友就嗌咗個叉燒滑蛋飯，賣相十分吸引！滑蛋份量多，叉燒色水靚，肉又厚，加埋秘製豉油 真係好正！食完我地仲想坐多陣，但舖頭啲客仲一路嚟緊😅於是就拿拿聲試埋佢個茶王之王，上枱時係有一大一細奶茶同一杯冰水，配塊曲奇同張卡仔😮仲有專人同你介紹呢杯茶嘅原料同師傅功力！我覺得茶餐廳做到咁真係好有Heart，完全昇華咗去另一層次！講返杯茶王，同普通奶茶真係好大分別！首先色澤係明顯較濃，飲落去甘、甜、回香，不同滋味喺口腔醞釀！雖然定價作高，但係以得獎奶茶嚟講真係十分值得一試！