老媽拌麵 (將軍澳中心) (已結業)

作為一個即食麵迷，一知道老媽拌麵在將軍澳開左餐廳，就立即約朋友一齊去食！我地專登避開晚飯時間，5點幾去到唔使等位就入得。餐廳裝修簡單，座位坐得舒服。由於新開關係，暫時只供應餐牌上貼有紅點的食物。我地兩個叫左一個蔥油嫩雞拌麵同一個清燉牛肉麵。蔥油嫩雞拌麵有好香蔥油味，香得黎唔會太咸，而雞肉都好嫩滑，完全冇雪味，只係略嫌個麵份量細左少少。至於清燉牛肉麵又是另一種風味，麵可以選幼麵或者刀削麵。湯底真係好清，唔會油膩，配麵好夾；牛肉原來係厚切牛展，咬落唔會太韌，有牛味。另外再加兩份小食：高麗菜豬肉水餃同酥炸甜不辣。水餃賣相一般，有少許肉汁，清清地。而甜不辣就相對較出色，上菜熱辣辣，外層脆內裡煙韌，再加埋甜辣醬，酸酸甜甜少少辣，中和油膩感。天氣太熱關係，每人揀左杯飲品，朋友揀左黑糖珍珠奶茶，而我就揀左蘋果梳打。黑糖珍珠奶茶飲落有黑糖味，略甜，不過可以接受，珍珠都好彈牙，珍珠偏少。蘋果梳打飲落清新，唔會過甜，夏天消暑一流。