兩個人叫左炭燒美國頂級Prime牛肉眼伴牛肉濃汁套餐$428 同 晚餐E - 煎刁草挪威三文魚伴白豆牛油檸檬忌廉汁$278 一齊開心SHARE~ 食物上枱時擺碟好精美，仿如藝術品。廚師精心製作，將藝術融入美食，好欣賞，未食先LIKE!
歐陸式小食 - 鮮蝦伴煙三文魚卷，用煙三文魚包住青蘋果西芹沙律，再用鮮蝦陪襯，味道清新鮮甜。
歐陸式小食 - 蛋角伴黑醋汁沙律，黑醋汁沙律酸味，特別醒胃。
廚師精選餐湯 - 南瓜忌廉湯，南瓜味香濃，仲用忌廉畫上圖案~
是日餐湯 - 椰菜忌廉湯，比較少機會飲到嘅忌廉湯，將椰菜花攪碎，入口好幼滑。
香草餐包 - 自家配方，外面鬆脆，裏面鬆軟。
炭燒美國頂級Prime牛肉眼伴牛肉濃汁，深深嘅烤紋，一上枱就已經聞到好香嘅燒烤味，而且份量好足。店員再即席磨碎阿拉斯加岩鹽提味，感覺特別好味
。牛肉眼下面有煎薯仔，外面薄脆，入面軟腍，仲吸收左啲肉汁，正!
肉鮮粉嫩，牛味濃郁，就算唔配上牛肉濃汁，都已經好夠味。可惜今次有啲韌，亦有少少根位，未能做到入口即化。
煎刁草挪威三文魚伴白豆牛油檸檬忌廉汁，香草薯蓉極之幼滑。
三文魚皮灑上黑椒同刁草，煎得好香脆，口感極佳。
餐飲叫嘅熱咖啡，要讚一吓，唔駛加錢就有即磨咖啡，特別香濃。難得牛奶亦有加熱過，唔會減底咖啡溫度。
咁美味嘅一餐梗係要用心愛嘅甜品作結。加$38將個甜品轉左一客焦糖燉蛋，燉蛋濃滑，焦糖脆口。
又加$48轉左一客朱古力心太軟，好精緻。
一切開啲朱古力漿就湧晒出黎，香濃又唔太甜，Bravo~
除左美食靚到好似藝術品咁，播放嘅音樂同周圍嘅環境都好有藝術氣息，好以去咗藝術館咁。
餐後店員更主動提議幫我地合照，仲建議我地行去佢餐廳嘅打卡熱點 - 波枱後嘅花花鞦韆椅影相就最靚喎。服務好貼心!
