期間限定宮崎牛海鮮盛宴
原價每位$698，而家只係$498，兩位起，啱哂約埋best friend去食。
套餐選用‘’日本一‘’宮崎牛及鹿兒島五花豚，未食已經流哂口水。
套餐包咗3款前菜、5款燒肉、野菜、2款海鮮、2份飯麵及甜品。
🥗前菜
• 特製宮崎牛他他配芝士及法包
店員首先會幫我哋燒一燒脆件法包，放上宮崎牛他他，並即席灑上芝士碎，軟滑鹹香嘅和牛他他、香脆法包與芝士碎互相配合，口感層次非常豐富。
• 迷你沙律
除咗新鮮沙律菜之餘仲有松子仁及櫻花蝦，平凡中見心思。
• 輕涮宮崎牛薄切西冷配海苔汁
薄切西冷嫩腍鮮甜再配合滑溜溜嘅豆腐及海苔汁，口感清新唔膩。
🥩燒肉
• 薄切牛舌芯鹽蔥汁
口感爽彈嘅薄切牛舌夾住鹹香鹽蔥汁，口感爽彈，鹽蔥汁於口腔中爆汁，juicy惹味。
• 宮崎牛薄切牛板腱配日本蛋
牛板腱超軟嫩甜香，配埋橙紅色蛋黃及醬汁，即時呈現出壽喜燒風，牛板腱蘸滿日本蛋醬汁，倍增滑溜口感及甘甜度。
• 宮崎牛特上里脊肉
脂肪分佈平均，口感細嫩中帶彈性，味道濃郁又鮮甜。
• 宮崎牛特上肉眼芯
肉眼芯充滿靚靚大理石紋，入口即溶，嫩滑鮮甜。
• 鹿兒島豚五花肉
油脂豐盈但食落唔覺油膩，豚肉甘甜並帶獨特嘅脂香，肉質軟嫩中帶彈性。
🥬生菜
新鮮生菜包燒肉一齊食，減油消膩，亦可豐富口感。
🦐海鮮
• 海老
超大隻，蝦味濃郁又鮮甜，爽彈到不得了。
• 原隻帆立貝
刺身級帆立貝，好厚肉，輕輕燒下就已經好好味，糖心鮮甜。
🍛飯麵
可選擇迷你盛岡冷麵或迷你韓式拌麵，而家+$168可升級宮崎薄切牛塊配日本蛋及白飯，難得嚟到當然要試下喇；呢個環節店員會代勞幫我哋燒，因為都需要幾高嘅技巧😝，燒到啲牛肉啱啱好就上碗及加蛋，與軟綿QQ口感嘅白飯撈埋一齊食，正到冇朋友呀。
🍧黑糖珍珠雪糕
濃郁嘅雲呢拿雪糕配上Q彈煙靭嘅珍珠，幸福感滿滿咁結尾。
🍹南高梅青檸梳打特飲$48
鹹鹹酸酸嘅南高梅加埋清新青檸，味道爽口怡人。
🍹Okinawa lime ginger ale $38
清新爽口嘅柑橘香味，有減油去膩嘅效果。
有幾款燒肉都需要技巧，所以都會由店員代勞，店員服務好好又nice，整晚都坐得好舒服。
