雲來軒 (已結業)

今晚，又係外出同朋友聚會既大日子，我地黎到尖沙咀棉登徑既《雲來軒》。黎到樓下，見到周圍都泊滿車，已經估到一陣會好多人。上到樓，場面就如店名一樣客似雲來，不過《雲來軒》既擺位設計好，枱與枱留有空間，唔會太迫。我地被安排坐係卡位，坐得非常舒服。未人齊，我地食住餐前小食先，炸腰果同吻魚仔乾，腰果香，吻魚仔乾脆。終於人齊，開始點菜，我地點左名廚亞保靚湯，今晚係紅蘿蔔冬瓜肉排雞湯。湯水鮮甜無比，加上天氣咁熱，食冬瓜就岩哂時候。份量都好足，我地4個人，每個人都可以翻添，有個朋友仲飲左3碗，我地連湯渣都食埋。之後我地點左金磚豆腐、話梅雞、雪山花之戀同埋懷舊雜菜煲。上菜速度都快，我地傾左一陣計，已經陸續上菜。金磚豆腐表面炸得脆，內裡軟滑，口感非常特別。話梅雞有別於一般做法，汁液比較多，即刻叫左2個白飯撈汁，味道調得岩岩好，唔咸唔淡，雞亦嫩滑。雪山花之戀好似賽螃蟹，味道較淡，但係加埋合桃，就會有又香又脆又滑既效果。懷舊雜菜煲，自己覺得係食材處理得好，菜洗得乾淨無沙，最怕菜有沙影響食慾。原本仲想叫燒腩仔，可惜已經賣哂。不過唔緊要，呢餐已經好滿足，又可以見到班朋友傾下計，過左個開心既夜晚。