鳥森 (已結業)

放工超攰，見倒有Mori set ，即刻嗌咗，由師傅話事，俾師傅盡顯功架。餐廳發輝職人精神，會先照顧客人，問佢地串燒有啲咩唔食，呢度仲有特別部位好似燒雞冠。最先嚟嘅係香茜雞絲沙律，作為開胃前菜，酸酸地令消化系統熱身。跟住就係師傅揀選嘅8道串燒，第一個係免治雞肉棒棒，濃厚嘅照燒汁滲透肉質，師傅用心以猛火燒到外脆，再保持嫩滑肉質，仲要加埋生蛋黃醬，刺激著脷嘅每一吋神經。跟住就係雞軟骨，濃厚醬汁係爽口雞軟骨前，味道更加突出。大口咬落去都只會聽倒爽脆嘅咯咯聲。雞心同腸都係入口軟身，係喉嚨已經溶化。值得一提，師傅每道串燒油份控制得非常好，雞冠同雞掌嘅油香滋味都唔會因為連續幾道菜而變得膩口，雞子更係帶起全埸高潮，一咬落去，入面嘅汁液係口腔飛嚟飛去，口感獨特。燒雞柳清清地，白膳魚肉嘅魚油甘香都俾師傅用燒物技巧帶出。出色嘅牛舌好值得推介。呢個時候再飲翻啖雞湯，中和油份同好暖胃，仲有個白布烏東，食倒係日本嘅風味。