影片
更多
2017-07-27
2233 瀏覽
今日胖侶話天文台道有一間打邊爐嘅餐廳環境雅緻之餘，個湯底仲要好得咁話，放工之後就二話不說，飛車過去食好西。餐廳位於天文台道8號一幢新起嘅大廈嘅2樓，淨係喺個𨋢大堂等緊𨋢都經已感受到高貴華麗嘅氣派。餐廳嘅裝修風格帶點中國風，以鮮紅色做主調，特別喜歡佢餐廳入面嘅吊燈，鳥籠設計嘅骨幹配以半透明嘅外殼， 加埋入面幾個隨意高低跌盪嘅燈泡，彷彿一群活潑可愛嘅彩雀，典雅得嚟又不失時尚。嗌咗一個酒窩三十道豐味歡樂時光套餐，首先嚟嘅係小食併盤，一共有四款炸物，分別係黑松露油炸鬼，南乳雞翼，炸香葉同埋香烤豬頸肉，其中黑松露油炸鬼呢個組合最令我喜出望外，食過無數咁多樣黑松露菜式嘅我，從來都未試過將黑松露同埋油炸鬼擺埋一齊食，勢估唔到呢兩樣嘢竟然咁夾，如果油炸鬼係熱嘅相信會更加好；炸香葉喺兩片香葉之間釀有薄薄嘅魚滑蝦滑一類物體，爽滑嘅滑肉令到口感更加豐富；而香烤豬頸肉味道都唔錯，不過就略嫌硬得滯；南乳雞翼炸得香脆，個南乳味若然再濃一啲相信又會更加好。先講下呢度嘅特色湯底四國豐味，四色嘅火鍋湯底有四川麻辣, 馬來西亞肉骨茶， 海南椰子雞， 同新加坡喇沙。 每種湯底入面嘅材料都相當豐富， 麻辣湯底入面有勁吸味嘅豬
餐廳位於天文台道8號一幢新起嘅大廈嘅2樓，淨係喺個𨋢大堂等緊𨋢都經已感受到高貴華麗嘅氣派。
餐廳嘅裝修風格帶點中國風，以鮮紅色做主調，特別喜歡佢餐廳入面嘅吊燈，鳥籠設計嘅骨幹配以半透明嘅外殼， 加埋入面幾個隨意高低跌盪嘅燈泡，彷彿一群活潑可愛嘅彩雀，典雅得嚟又不失時尚。
嗌咗一個酒窩三十道豐味歡樂時光套餐，首先嚟嘅係小食併盤，一共有四款炸物，分別係黑松露油炸鬼，南乳雞翼，炸香葉同埋香烤豬頸肉，其中黑松露油炸鬼呢個組合最令我喜出望外，食過無數咁多樣黑松露菜式嘅我，從來都未試過將黑松露同埋油炸鬼擺埋一齊食，勢估唔到呢兩樣嘢竟然咁夾，如果油炸鬼係熱嘅相信會更加好；炸香葉喺兩片香葉之間釀有薄薄嘅魚滑蝦滑一類物體，爽滑嘅滑肉令到口感更加豐富；而香烤豬頸肉味道都唔錯，不過就略嫌硬得滯；南乳雞翼炸得香脆，個南乳味若然再濃一啲相信又會更加好。
先講下呢度嘅特色湯底四國豐味，四色嘅火鍋湯底有四川麻辣, 馬來西亞肉骨茶， 海南椰子雞， 同新加坡喇沙。 每種湯底入面嘅材料都相當豐富， 麻辣湯底入面有勁吸味嘅豬皮同埋芽菜，麻味十足， 夠曬惹味。至於海南椰子雞就夠曬清甜滋潤， 雞件非常嫩滑。而肉骨茶味道亦夠曬正宗，藥膳味濃郁，夠曬保身。
海蝦番薯蜆，海蝦隻隻都新鮮彈牙，同鮮甜嘅蕃薯蜆各不相讓地取悅我嘅味蕾，打邊爐最重要始終都係啲海鮮夠鮮。
頂級美國安格斯牛頸脊，安格斯油脂豐富，油花分佈均勻，入口牛味濃郁，塊塊都好好味。
日本黑毛豬腩肉，廚師將每一塊豬腩肉都片到好薄，落水拖一拖就即刻食得，由於片得夠薄嘅關係，做到入口即溶，然後淡淡嘅豬味就會喺你口入面慢慢咁樣滲出嚟。
鮮蝦水餃，水餃入面嗰隻蝦絕對唔比用竹籤吉住嘅嗰一隻海蝦遜色；菠菜皮韭菜餃入面有勁多既薑粒，同本身嘅韭菜味相輔相成，而洋蔥豬肉蛋餃個外皮就好特別，真係用蛋嚟做㗎，所以喺個煲度撈番上嚟嘅時候要小心 ，如果唔係就好容易整穿個皮㗎喇。
酒窩黑熊啤，終於到我今晚最期待嘅一個餸菜啦，之前喺網上面見到其他食友嘅相經已覺得呢個黑啤熊巧qq巧打意，黑熊啤啤賣相搞笑， 既有豆雞眼又有射哩眼， 實在係可愛到唔捨得食。原來佢唔只可愛，仲好好食㗎，一入口享受完彈牙嘅感覺之後，墨魚味就會緩緩咁滲出，真係睇得又食得。
蔬菜拼盤，呢度嘅蔬菜拼盤比起其他餐廳嘅款式特別多，蔬菜平館定係色彩繽紛， 集齊咗幾色蔬果， 有紅色嘅車厘茄， 黃色嘅粟米芯， 白色嘅椰菜花， 橙色嘅南瓜， 綠色嘅 生菜油麥菜， 同埋紫色嘅沙律菜。除咗一般大路嘅生菜，仲有喺泰國常想見嗰隻椰菜苗等等，種類包羅萬有。
另外仲有拉哂絲嘅芝士手打蝦丸，手打墨魚丸，黑椒牛筋丸，台灣香菇貢丸，脆皮芝士腸，稻庭烏冬，雜菇拼盤，蒜蓉炸鮮魚皮同埋即炸手工響鈴卷添，咁多嘢食埋單都係三百零蚊一位， 每人加多40蚊就紅白酒汽水任飲，仲要有個咁靚嘅環境同埋一個咁大嘅騎樓，可以招呼到一啲食煙嘅朋友，咁正嘅地方去邊度搵啊。
張貼
