吞POT 雞煲火鍋.住家菜 (已結業)

放工後約左朋友係旺角行下街，順便可以試下一直期待已久既餐廳- 吞Pot 雞煲火鍋，見到都開左幾間分店，質素都應該有返咁上下，所以點都要過足雞煲癮！話到明係雞煲專門店，除左傳統既重慶麻辣雞煲外，仲有獨有不同類型既雞煲，例如螺片花膠雞煲同辣酒花螺雞煲，想滋潤下既朋友可以嘗試。今次我地就試下最傳統既重慶麻辣雞煲，因為朋友係一位麻辣控，鐘意嗰種「麻」既感覺！一打開個蓋，嗰陣香味就立刻衝出黎，而咬落去時，啲雞保持嫩滑同時又保留到嗰種味道，果然質素屬於高水準！然後再嗌左自家響鈴卷同炸魚片頭。響鈴卷因為係即叫即炸既關係，即使浸左湯底一至兩秒後，仲仍然挺身，咬落去能保持到炸嘢嗰種口感，呢樣令我十分深刻。炸魚片頭方面，即炸之餘再灑上少許椒鹽，對我黎講，簡直係一個完美既結尾。