冰室整齊企理，環境光猛，座位都唔少，有多張梳化卡座、長梳化座嘅二人枱和四人枱，仲有幾張圓枱添，坐得幾舒適。
餐簿都幾厚，選擇多，但我地就睇中「暖笠笠煲仔小菜」嘅二人餐（$228），有兩款自選小菜、油菜一碟、白飯、燉湯和凍/熱飲兩杯，樣樣有齊，仲有燉湯都係呢個價，真係好吸引！
先上大大盅的桂圓雪梨燉湯，熱度十足，正！湯身清澈，沒有泛油光，湯料有桂圓、紅棗、瘦肉、雞腳、雪梨等，好足料！味道甘香清甜，滋潤順喉，飲完全身暖笠笠，好滿足！
足足有四十煲仔小菜任擇，真係眼花撩亂。要咗紅酒牛尾煲，大大煲，好有份量。牛尾肥瘦參半，嫩肉夾雜着油潤的肥膏，唔止炆得腍嫩，仲好入味，牛味亦香濃，用啲汁來撈飯一流，全煲都好正！
另一款揀咗口水雞（例牌），除咗脾翼外，件件都已去骨，啖啖肉，正呀！嫩滑的雞肉連埋滑嘟嘟的雞皮，吃出份油香，好吃！加埋香辣惹味的醬汁和香脆可口的花生碎，風味十足，喜歡！
菜不能少，附送一碟油菜 就最岩我。生菜翠綠爽嫩，好新鮮，只係加咗少少豉油，少油少鹽，夠健康。
飲品轉咗特飲，超驚喜！用咗啤酒杯載，又大杯又有特色。男朋友要了杯大小姐紅豆奶茶（$9/跟餐），好足料！茶味唔太濃，幾有奶香，加埋甜美的紅豆，大粒粉綿，食下食下，差唔多食晒，好飽肚。
我要杯一顆檸檬鮮果茶（$9/跟餐），甜度岩岩好，茶味濃，仲有好多菠蘿、桃、鮮火龍果、椰果等水果粒，落足料，同樣食到好飽肚，哈！
