拿督星馬大飯店 (已結業)

觀塘有好多臥虎藏龍既隱世小店，今次介紹既拿督，就隱沒左響觀塘碼頭旁邊既熟食大樓入面，如果唔係專登去，實在好難發現。行入去大樓一樓，會發現拿督佔左好幾間舖，我通常會走去最旁邊果個舖位，因為比較新淨同光猛，感覺乾淨d西式d，魚缸入面既金魚仲會游下游下，好得意。呢度有好幾樣名食，而家逐一介紹。如果你抵得辣，先推介你「豬頸肉胡椒湯麵」，湯底夠濃夠刺激，豬頸肉又腍又入味，可以話係豬頸肉界既典範，旁邊既蘿蔔都唔好睇小，煮到入晒味，又不失蘿蔔本身既鮮甜味，大愛！「大細腳黑豉油乾撈麵」，大腳指豬腳，細腳指雞腳，睇相就知道，兩樣都俾黑豉油炆到入肉內骨，同炒麵撈埋一齊食，絕配。新加坡最出名就係「海南雞飯」，拿督都有做，而且做得不錯，雞肉夠嫰滑，雞油飯做得香，每粒都沾滿油香，好啱食肉獸朋友。飲品都唔簡單，相中前面既係「腐竹薏米冰」，其實根本就係一碗雪到凍冰冰既腐竹薏米糖水，好足料，唔會死甜，當甜品咁食都得；後面既係「忌廉鮮奶紅豆冰」，如果你喜歡飲忌廉鮮奶，又鍾意食紅豆冰，呢一杯正好一次過滿足你兩個願望！