長發大酒樓 (已結業)

凍冰冰最好就係打邊爐，而so far覺得打邊爐至抵都係長發大酒樓，任食任飲成人星期一至五每位58，假日加多十蚊，另每位收醬油8蚊(有過醬油bar可以任攞生熟蒜呀xo醬雞蛋等等)及湯底8蚊，八點半之後又每位平10蚊。任飲任食火煱當然唔好要求有好多海鮮貴嘢食，不過選擇其實都唔算太少，美國肥牛好多時都會幾靚吓架，有時見老豆叫啲鱔同魚雲都好好(有時都會唔靚)，我覺得其實火煱料新鮮就得啦，長發火煱成日都好多人食，啲料turnover快，所以絕大多數時候啲料都新鮮。又雖然係任飲，不過啲飲品一啲都唔馬虎，啤酒就唔會有名牌喇，不過老豆話都飲得過，汽水就有樽裝可樂雪碧芬達忌廉，又有罐裝橙汁同百事，仲有嗰啲馬蹄水嗰啲選擇。因為抵食，我次次都要六點幾就去到，因為我次次坐低冇耐到七點就full哂，所以想食就要早啲到。