Sky726

今日係同男朋友嘅紀念日，去完睇戲之後佢帶左我嚟呢間Sky726。呢幢野都好多餐廳，而Sky726就係呢幢野最高果層，上到去個環境好chill，加埋啲燈光，真係無揀錯地方！侍應好好咁安排左我地坐近窗嘅地方，仲可以睇住日落添。睇左一陣個靚景，都係要揀野食先。我地見佢都有個dinner set, 由前菜到甜品乜都有，但對我地嚟講有啲大份，所以我地都係散叫左四樣野。首先上嘅係煙三文魚沙律，個份量都唔少，三文魚感覺仲多過菜，食落都好新鮮，唔會係求求其其整嘅一碟。之後好快就上埋個蟹肉南瓜湯，個湯好綿，食得出好真材實料，一定用左唔少南瓜，而蟹肉都唔少架。等左再一陣我地揀嘅香煎帶子寛條麵伴煙紅椒汁都上埋。個帶子煎得好香口，忍唔住就食左佢先。而個寛條麵就好似佢餐牌講爽口，有厚度嘅。如果想煮得軟啲記得講俾侍應聽先。最後甜品我地揀左個72%朱古力心太軟，可能因為個朱古力夠濃，整出嚟唔會得個甜字，朱古力嘅味道都有出到嚟，算好出色。呢餐埋單五百幾蚊，我覺得物有所值，仲有靚靚風景睇，有機會可以試下！