阿來客棧雞煲火鍋 (已結業)

上日文堂之前又喺銅鑼灣搵嘢食，好耐冇食雞煲，喺OpenRice搵到呢頭開咗間新嘅，就去食吓。餐廳做緊「優惠三重奏」，幾款口味嘅雞煲都半價，仲有特價配料同糖水送，好抵食！唔駛等好耐個雞煲就上菜喇，我哋叫左「重慶辣雞煲（少辣）」，一隻雞嘅分量好多吓，兩個人勉強食得晒，個汁好香濃，雞肉又嫩又入晒味，好好食！食晒大部分雞就加湯再食其他火鍋料，「手打四寶丸」嘅鮮蝦丸、墨魚丸同牛肉丸都好彈牙，鯪魚丸就稔咗啲。「即包鮮蝦雲吞」成粒乒乓波圓滾滾咁好靚仔，食落好彈牙，入面勁多蝦，好好食好推介呢嗰！至愛嘅「爽脆白鱔片」好新鮮，四片大大片大滿足。咦～又點錯嘢，哈哈！點咗「翡翠豆苗」，其實係想食普通嗰隻豆苗，哈哈！「娃娃菜」索晒湯好好食，但就越食越辣，爽！最近一定要講講個「即炸魚皮」，真係炸得超脆，就咁食或者點一點湯都超好食，又大塊份量又多！最後上埋綠豆沙，唔太甜感覺好滋潤，食完火鍋下吓火啱晒。聽店員介紹呢度嘅廚師係「來來雞煲」嘅班底，食物水準相當高！食完好回味嘅雞煲！