一喜‧燒肉

營業中

休息中

發現呢度開咗一間新嘅燒肉，就決定約埋朋友一齊嚟試，呢度嘅燒肉有幾款價錢揀，日本黑豚、美國和牛、安格斯和牛同日本和牛，我哋今次就揀咗美國和牛，時間都有兩款揀，我哋就揀咗90分鐘，價錢係$268。咁啱仲做緊第二位半價，抵！一坐低店員就已經送上一碟牛，上面有一口牛、牛小排同牛肋肉，可以燒住再慢慢掃QR code叫嘢食。牛嘅選擇有好多唔同嘅部位，牛肩脊、牛板腱、牛胸腩、牛仔骨同牛舌，而亦都有好多款調味選擇，原味、鹽味、燒肉汁、味噌、辛辣味，而我最鍾意食就係原味，因為最可以食到牛肉嘅質素，而呢度嘅牛肉質素食原味係絕對冇問題。除咗牛肉，仲有唔同嘅雞肉豬肉海鮮同埋熟食選擇，而出面放題區亦都有雪糕雪條、蛋糕、沙律、唔同嘅蔬菜選擇。我最欣賞嘅係除咗燒肉汁同埋鹽之外，仲有孜然粉、辣味粉等其他調味料提供。餐廳環境舒適，個爐亦都做到唔大煙味，下次都會再嚟。