彩福皇宴 (京瑞廣場1期)

營業中

休息中

唔好睇小石門依間呢度，只係石門站果一兩間商場，已經有非常之多間酒樓，競爭可以話非常激烈。屋企人黎飲茶通常都係會揀彩福或者皇苑，今日就嚟咗彩福。一排冇黎，人呢，就仍然非常多，可能係因為星期日六嘅緣故。啲嘢食嘅選擇都多咗，今日嗌咗個幾款點心，仲有好似幾得意嘅海鮮炆鴛鴦米。海鮮炆鴛鴦米嚟到，份量非常大，上面有好多唔同嘅海鮮配料。驚喜地係竟然有珊瑚蚌，而且份量都唔少，其他仲有帶子，同埋蝦，當然仲有啲洋蔥同韭菜花之類嘅蔬菜啦，價錢只係90幾蚊，算係比較驚喜嘅一味炒粉麵。份量多到三個人食，都差啲食唔晒。另外今日嘅點心，比較特別嘅係有一個鮑魚仔燒賣。鮑魚仔好細好細一粒非常CUTIE，個樣就好似嗰啲貴價蠔皇鮑魚咁樣，只不過就縮細左多好細粒咁，咬落都仲有幾有質感同埋鮮味。下面嘅就係普通燒賣，入邊嘅蝦肉同豬肉都幾彈牙㗎。仲嗌左一個煎鯪魚肉釀尖椒啦。今日呢份辣椒，有一半唔辣，另外一半都幾辣，就睇下大家彩數啦。埋單大概$300到，都算係唔錯嘅選擇，所以次次黎都非常多人。