犇之食堂 (已結業)

今日出開銅鑼灣行街順便食埋午餐，行過見到係食台灣菜，主打賣牛肉麵 仲要有奶蓋飲，吸引咗熱愛台灣美食嘅友人拉住我入去。淨係門口外觀就覺得好小清新嘅cafe feel。水果烏龍茶甜甜的帶點酸度，淡淡烏龍茶香，橙味較濃 好冰涼好解渴。蜂蜜紅棗茶飲落好補好健康。犇之三寶麵極豐富有牛筋、牛腩、牛肚，飲一啖湯充滿濃郁嘅牛味，麵質煮得適中有咬口，牛筋煮得好軟 入口即化咁濟，成口都充滿骨膠原😍牛腩同牛肚煮得好入味，肉質唔韌口。清燉牛肉麵啖湯甜甜地幾清，麵質煮得岩岩好有咬口，牛肉煮得好入味仲好軟嫩。士林炸花枝丸炸得乾身不油膩，花枝丸彈牙仲有啲花枝碎係入面，外脆內彈 好食。香酥排骨大大件，咬落多汁唔乾柴，炸得乾脆唔油膩 好食。