Mee...lemongrass (將軍澳中心) (已結業)

約咗朋友喺將軍澳行街， 突然見到呢間fusion東南亞菜， 價錢都幾實惠， 雖然只係七點鐘， 但餐廳已經坐滿人， 想必質素應該唔錯， 所以即刻決定要走入去食番餐。呢度嘅食物種類都幾多， 有飯、喇沙、檬粉、 串燒等等， 仲有雞翼、春卷、蔗蝦呢啲小食。 真係有好多選擇。雖然我哋只得兩個人， 但都嗌咗五樣嘢食， 再加兩杯飲品大家share。新張期間飲品做緊外賣買一送一優惠， 我哋分別叫咗 鮮果四季春茶同埋富士蘋果芝芝冰茶， 兩杯都唔錯 ，唔會太甜， 尤其是富士蘋果個杯好有蘋果香味。食物方面， 我哋就叫咗個廚師推介嘅馬來一品牛柳粒， 香茅雞翼， 串燒， 蝦春卷同埋蔗蝦。雞翼炸得好香脆， 串燒好味， 蔗蝦份量大好抵食， 由於呢度嘅蔗蝦係將條蔗完全包住，所以條蔗咬落仲有好多汁，好香甜可口， 頗有心思，值得一讚。喺收銀處嗰度仲有啲小玩具同埋糖果可以免費派發畀小朋友， 整體嚟講無論食物質素服務環境方面， 質素都唔錯， 下次一定會再嚟試下佢嘅喇沙同埋其他食物。