金殿泰國菜 (已結業)

假期的最後一日，近近地到附近食下泰國野嘆下，呢間金殿唔係開左好耐，但每次經過都好旺場，是日就試下佢先。肉碎生菜包就成日見啦，呢度有個豬頸肉生菜包，咁得意就叫呢樣先。上枱時賣相唔錯呀，豬頸肉一大碟加一碗唐生菜，豬頸肉醃得入味，加上醬汁，同時食到鹹酸辣同香料味，味道豐富肉有咬口，包埋生菜爽口又清新，仲有啲韓燒包生菜嘅感覺添，哈哈。跟住有鐵板蠔仔炒蛋，蛋炒得香口蠔仔又肥美，最正係下層嘅芽菜，吸飽蛋汁同蠔仔汁勁正，大大盤超抵食。再來係紅咖哩牛肉，滿滿一碗好足料，除左牛肉，仲有泰國小茄子，青紅椒，豆角，菠蘿等配料，咖哩好香椰味，微微辣好正。配咖哩就叫左係蒜蓉包，估唔到咁厚切仲有五塊咁多，蒜蓉包勁香脆，點埋個咖哩超好味呀。咖哩太大碗食唔晒，再加多份薄餅送佢先，上枱時超熱，雖然感覺上無蒜蓉包咁抵食，但呢份薄餅又香又脆，咬落煙韌口感正，咁好味抵啦。最後係飲品，要左青檸疏打同椰汁沙冰，兩杯都係大大杯滿晒㗎。朋友嘅青檸疏打好夠汽，清涼消暑啱晒夏天飲。自己杯椰汁沙冰勁濃郁，重重的椰汁味，啲冰打到超碎唔會入口一口係冰，正喎。整體黎講真係大碟夾抵食，價錢超貼地，味道好食唔油膩，讚呀！