潮福蒸氣火鍋 (已結業)

潮福蒸氣火鍋一啲都唔陌生，估唔到今次一大班舊同學約食飯又約咗潮福，但今次食的是深水埗店。今次朋友仔冇揀到任食，反而揀咗套餐。之前都冇留意到，原來蒸氣火鍋套餐圍起每人只係＄200左右，價錢比飲食相宜得多。第一次咁多人食，店員一開始就到左好多米落去煮粥啊！蒸氣鍋未準備好之際，我哋先飲湯同試吓佢地的招牌乳鴿。即製的燉湯好暖胃。潮福的招牌乳鴿確係冇得輸，皮脆肉嫩，味道恰到好處。蒸氣鍋一開始就係貝殼盛，貝殼多到一次過都蒸唔晒，要分開蒸。最鍾意食細細粒嗰隻，味道比較重。海鮮當中我最鍾意食蒸元貝，因為加上蒜蓉比較惹味，而且粉絲可以吸收晒海鮮的精華。龍躉件亦係我好鍾意的一款，鍾意食龍躉因為貪佢有魚味得來口感好特別，膠質好重。席間見到店員準備我哋的食材，實在非常誇張！除咗海鮮之外，蒸和牛都係呢晚的亮點。冇諗過牛肉蒸都可以做到咁好食，肉質好嫩，肉汁又多，仲好夠牛味添。最後當然係鮮味十足的粥底啦！味道好鮮、好香、好濃。再食潮福發現點套餐都幾好，分量剛剛好唔會過飽，價錢亦好相宜。