炑八韓烤 (歐亞銀行大廈) (已結業)

差唔多到12月啦，啲餐廳都開始推出聖誕套餐，連我今晚去嘅炑八韓烤都唔例外，所以我哋就點咗呢款聖誕月見和牛奇妙套餐。呢個聖誕月見和牛奇妙套餐，入面包括有牛舌，豬肋肉，牛小排，韓牛前胸肉，蔥蒜牛五花，雜菇，當然係主角嘅月見和牛肩肉扒。蔥蒜牛五花：油脂滿滿，經過火烤，油香四溢，蔥蒜香味好濃，用嚟包生菜一齊食就最啱。月見和牛肩肉扒：好大塊薄切牛扒，職員會主動幫我哋燒，呢塊牛肩肉脂肪嘅分布均勻，牛味十足，而佢哋會配有一隻溫泉蛋，用嚟拌入秘製醬汁，令牛肉入口變得更加嫩滑。韓牛前胸肉：用咗秘製醬汁醃製，非常之入味，但仍能食到濃郁嘅牛味，脂肪比例較高，燒嘅時候油香四溢，好啱包生菜一齊食。牛舌：三塊嘅薄切牛舌，牛味特濃，口感獨特，一試難忘。豬肋肉：三條去骨嘅豬肋肉，用咗秘製醬油醃製，肉味更突出。牛小排：採用厚切方式，口感會更佳，脂肪含量較高，有好靚嘅雪花紋，唔需要蘸任何醬汁。加少少鹽就更能突出牛肉味。柑橘鮮橙果茶：果味香濃，甜度適中，清新怡人，可以好有效消減燒肉所帶嘅油膩感，係燒肉時好啱嘅飲品。呢度泡菜，醃蘿蔔，爐邊蛋，粟米芝士，仲有係夾住肉嚟食嘅生菜都係可以無限追加，令大家可以大吃特吃。