味之亭網燒食堂 (已結業)

青衣城d食肆真係愈來愈多，都真係需要啲時間先可以食匀咁多間。今日我哋揀左食定食，因為比個定食餐牌吸引住，重點係唔貴喎。定食叫左兩個，一份係蒲燒鰻魚丼，而另一份係日本味噌雞鳥烏冬，以賣相來講兩份都唔差喎。鰻魚丼都幾足份量，嚟到仲好熱架，魚要親熱食，先最好食！加埋鰻魚汁，夠juicy但唔油膩。餐牌上寫住係用左日本青森米，同平時食開既珍珠米唔同，大粒d之餘仲軟硬適中，粒粒分明。另外就係雞鳥烏冬，奶白色既湯底非常濃郁，烏冬有口感，加埋木耳絲更能提升層次，另外配菜充足，夠健康。主角雞扒煎到香噴噴，雞皮仲有少少趣口，肉質嫩滑，唔油膩。明太子魚餅，睇得出係用心製作，中間釀左橙紅色既明太子，提升口感亦係魚餅既靈魂所在，簡單之中又帶點不簡單。汁煮牛舌粒，雖然細細碗，但原來都幾多。牛舌粒煮到好淋好入味，細細粒易入口，不錯。芝士年糕，口感似棉花糖，熱辣辣軟綿綿之餘還帶著芝士既香。最後仲有云呢拿雪糕送，食得出應該係自家製，仲見到一粒粒云呢拿籽係雪糕入面，夠晒透心涼，大滿足。