大瀛喜日本料理 (已結業)

好耐冇食過放題於是今日同男朋友米色曾經瘋魔一時嘅大瀛喜，估唔到而家都仲勁多人食，幾乎滿座禁仔。比起舊店，整體嘅裝修新淨好多，有種高級放題感覺，仲有高枱，好有格調。自助區雖然唔係好大但係嘢食都幾多，冷盤有蝦、青口同埋蜆，仲有好多餐前開胃小食，包括螺肉沙律、中華沙律等等。而熱食方面，有羊腩酸菜魚、辣酒煮螺、娃娃菜，仲有蟲草花螺頭湯，超好飲！另外仲有幾款炸物，竟然有葡撻，係我最愛！首先當然係食咗刺身先，刺身嘅款式都幾多，而且全部都好新鮮，同埋好厚切，一啲都唔慳皮。之後就到壽司同埋軍艦，唔係一般貨仔，全部都係我好鍾意食，特別係XO醬燒牛肉壽司，同埋芝士鰻魚、吉列蝦壽司等等，好高質！另外仲有啲中式嘅小食，有豉汁蒸鱔球、蒜片牛柳粒、燒羊架、沙律蝦、燒牛舌串等等，記得有一個好好食嘅係蟹粥，同埋花膠，放題竟然有蟹同埋花膠食，真係覺得好抵！雖然食到好飽但係仲有第二個胃，出面有好多甜品，同埋軟雪糕機，隔離仲有好多德國軟糖做配料，另外每人仲有一盒Häagen-Dazs雪糕，今次放題覺得幾滿意 唔使價錢都唔貴，258蚊位。