Mee...lemongrass (將軍澳中心) (已結業)

呢排將軍澳中心裝修完之後，開咗好多新舖， 都有唔少餐廳進駐商場，梗係同朋友一齊去試下。正值晚上7點，都幾多人排隊，但好快都安排到座位。先嗌咗一個檳城炒貴刁， 味道都唔錯，尤其係落咗好多黑醬油，非常濃味，加上海鮮同河粉好夾，食落都幾爽口。呢一個鐵板牛柳粒都唔錯，好多黑椒汁，夠曬濃郁，而且鐵板熱辣辣，牛肉好香口。串燒嘅賣相都唔錯，有牛肉同雞肉，不過份量就比較少，如果可以多啲就更好啦，不過我都幾欣賞佢嗰醬汁，沙嗲醬都幾惹味。至於呢個 香脆鱸魚配青芒果，味道清新開胃，而且爐魚炸得好香脆，但唔會好厚，加埋酸酸甜甜嘅青芒果絲好醒胃。店舖入面仲有一個飲品店嘅位置，可以買完飲品喺度飲或者外賣飲都得，款式都幾多，咁啱仲做緊優惠，有買一送一，平均都係十零蚊杯，非常抵飲。非常推薦呢度嘅芝芝冰茶，尤其是蘋果芝芝冰茶， 坊間都比較少見到蘋果嘅手搖飲品，飲落好香果味，加埋上面嘅芝士奶蓋，唔會太甜，味道唔錯。 最後埋單嘅時候，仲見到有一個畀小朋友拎玩具嘅小箱子，感覺都幾貼心，可以畀啲小朋友玩，又可以氹佢哋開心，不過我就過咗小朋友嘅年紀，如果唔係我都想攞一個玩具，哈。