大少燒味茶餐廳

營業中

休息中

大埔多好嘢食係人都知，而廣福道附近，圍住大明里廣場一帶嘅餐廳更加係高手林立。呢日響大埔收工，跟手去親戚屋企食飯，諗起不如去大少燒味茶餐廳度斬啲料加餸啦。叫咗例牌嘅叉燒、乳豬同埋燒鴨，味道嗰啲我晏啲再分享，講一講啲題外話先。就係一定要讚吓餐廳入面嘅職員全部都好有禮貌，尤其是喺我等緊斬料果陣，都有三四位年長組嘅顧客買燒味外賣，但係收銀姐姐都好有耐性咁幫佢哋落單，非常抵讚！熟練嘅燒味師傅好快就幫我斬好哂啲燒味。我上到位親戚屋企，佢哋都話啲燒味個賣相好得。埋位食飯，「叉燒」有少少燶邊，半肥半瘦香氣四溢，食落去又夠肉味。「乳豬」脆皮鬆化，伴隨少少油脂嘅甘香，調味控制得好好，唔好太鹹或者太淡。「燒鴨」有肉汁，兼且唔會靭。都係非常之有水準。講真，燒味就梗係趁熱食最好味，下次再食嘅話，希望有時間堂食啦！