河內越式料理 (村南道)

營業中

休息中

自從冇左晚市堂食之後都好耐冇出街食，但今晚老婆大人話想食越南菜，我就醒起大圍港鐵站附近有一間成日都見到人龍排隊嘅越南菜館(河內越式料理），超級好方便大圍站行一分鐘就到。原來佢哋有下午茶，而且價錢都好經濟實惠。佢哋除咗有湯粉檬粉之外仲有好多越南小菜。但今日老婆話想食越南粉，咁就主力睇返有咩湯粉好食。係門口點完餐（原來仲有9折外賣）等咗十分鐘左右就已經做好，真係好快手，趕得切返屋企睇住電視慢慢食。越式香茅雞翼撈檬$60 三隻大大隻醃到好入味嘅又炸得好金黃既香茅雞翼，再配埋海量咁多嘅檬粉，仲有佢哋好特別嘅檬粉汁，簡直絕配，而且又唔會好酸，好啱我口味。越式香茅豬扒湯河粉$62 同香茅雞翼一樣醃得好入味，而且塊豬扒超級大塊仲大過我塊面，個湯底重超級鮮甜好濃郁，飲得出係拗咗好耐而且冇味精，真材實料。越式豬頸肉$29 只要叫一個粉就可以追加少少錢買多個小食，塊豬頸肉好大塊而且燒得好香。越式炸蝦餅$29 蝦餅好彈牙啦而且炸得好香，食到啖啖蝦肉。椰汁珍多冰（跟餐+$12）食越南餐點少得一杯椰汁珍多冰，濃濃既椰汁香，又唔太甜，仲有好多配料，一個味道多重享受。簡直係一個完美總結。