祥景茶餐廳 (已搬遷) 新店位置

小弟由細到大都住係良景，十幾廿年黎祥景可以話係第二個飯堂！首推佢D凍奶茶！唔知係我偏見太深定係唔識賞其他o個D，祥景D凍奶茶既質素係第二度搵唔到(包括大酒店同D高級餐廳)，味道到底係點真係唔係筆墨可以形容，但係我每次介紹朋友試佢地都話一流！而且水準好稳定，未試過有一次係差既！以前讀書時試過一日五杯....就如其他評家分享，而家係香港自己做埋麵包同蛋撻既茶餐廳已經好少，如果講埋質素既話可以話寥寥無幾，但係祥景就係其中之一！尤其係D蛋撻，新鮮出爐o個陣時D伙計就大聲講：「蛋達出爐！」真係好有Feel！之後就會見到有唔少人即刻要叫番一、兩個！至於其他食物同餐都有一定水準。另外要讚既係佢間中都會推出D新餐，最明顯既係D早餐同下午茶餐，以前得幾個揀，近幾年再加埋鮑片麵、厚多士等等。環境方面可以啦！早排閃電式翻新(差唔多可以話一夜之間)，近期再加埋部大電視。真係識做生意！以上都係小弟個人既睇法，會有D偏見(因為感情份好高)！希望大家見諒。