正潮樓 (富通大廈)

營業中

休息中

揸車喺銅鑼灣搵嘢食，唔想捱貴商場泊車錢，係街鋪都有好嘢食，見到呢間餐廳食潮州嘢，上網評價都唔錯一於嚟試吓，餐廳環境闊落，唔會坐得好迫，仲有VIP房，唔覺意俾我見到有明星喺房間入邊食飯添。我哋叫咗餐廳最出名嘅潮州食物，花甲好大隻，每一隻都脹卜卜，食落非常鮮甜，配埋魚露同酒香，好好味，一隻一隻食過唔停口。韭菜煎粉果，其實我第一次食，朋友話係正宗潮州菜先有得食，原來真係幾香，外皮煎到少少卜卜脆，入邊有軟糯嘅感覺，連埋韭菜絲喺入邊好香，味道好特別·蠔仔粥每次食潮州嘢都必點，蠔仔大大隻，配埋其他配料，雖然我哋只係叫咗一碗，但原來一碗份量都好多。另外叫咗個滷水拼盤，鵝亦好入味，豆腐夠軟滑，最驚喜係鵝肝，好滑好香，入口好creamy 超級好味。另外糖醋麵係我個人最鍾意，面底煎到好香好脆，加埋糖同醋，我自己一個可以食大半份，好好味呀。呢度仲有我鐘意既反沙芋，但今次實在太飽下次一定要試。