東海龍王海鮮酒家 (已結業)

早兩日約個客係灣仔食晏傾野，原本諗住貪就腳落皇悅地底食番龍皇酒家，去到先知原來轉左手，變左做東海龍王，仲要係新開張無幾耐。橫掂都係食中菜，問左個價錢都OK，加埋地方睇落幾光猛企理，於是就坐低照食。可能因為新開張，中午時間都唔算好多人，靜靜地0岩哂傾野。比起其他茶樓，老實講呢度既食物選擇就少D，不過食野貴精不貴多，好唔好食先係重點。有個余經理鬼咁熱情同我地打招呼，推介我地試呢樣試果樣，最勁既係，可以度身訂做，幾咸幾甜由食客話事。結果點左十個八個點心小食，真係有意外驚喜：避風塘豬扒仔－－豬扒肉質鮮嫩，蒜、椒及豆鼓香味四溢，必食推介；蟹粉小籠包－－皮薄多汁，食完齒頰留香，有衝動想叫多一隻；1965陳皮牛肉腸－－據稱係用1965年既陳皮黎整，食落有一種奇異既香味，正；北海道牛奶豆腐－－滑溜，甜味適中，女仔應該好鍾意；南薑茶湯丸－－好辣又好甜，重口味者首選；其他如蝦餃、叉燒－－中上水準。服務方面，上菜速度尚算迅速，侍應招呼頗為周到兼且笑容可掬，普遍有禮貌，令人感覺舒服。